Oqaaseqaatit nalinginnaasut

Nunamut tamarmut akileraarutissap aamma nunamut tamarmut akileraarutissap immikkut ittup procentissaannik aalajangiinissamut killissarititap 1. november nallertinnagumiit 1. december nallertinnagumut sivitsorneqarnissaanik siunnersuuteqarneq, Inatsisartut suleriaasiata allanngortinneqassangatinneranik, ukiakkut ataatsimiittarnerup ullut 14-it tikillugit kinguartinneqarnissaanik kinguneqartussamik tunngaveqarpoq. Ukiakkulli ataatsimiittarnerit sivikillisinniarneqanngimmata pisariaqarpoq nunamut tamarmut akileraarutissap aamma nunamut tamarmut akileraarutissap immikkut ittup procentissaannik aalajangiinissamut killissarititaasup taamatulli kinguartinneqarnissaa (aningaasaqarnermut inatsit).

Taamatuttaaq Namminersornerullutik Oqartussat missingersuutaat pillugit Inatsisartut inatsisaanni § 10 allanngortinneqartussatut siunnersuutigineqartussaavoq.

Oqaatigineqassaaq aammattaaq kommuninut akileraarutissat (kommunit missingersuutaat) 1. december nallertinnagu aalajangersarneqartussaammata. Ulloq killissarititaasoq assigiilersussaammat missingersuusiornerup nalaani kommunillu ataqatigiissaareqatigiinnerunissaq pisariaqassaaq. Tassani pineqarput Namminersornerullutik Oqartussat kommuninut tapiissutigisartagaat pillugit aammalu sanaartugassat tungaasigut isumaqatigiissusiornissat. Kingullertut taaneqartumi immikkoortortat arlaqartut iluanni kommunit Namminersornerullutillu Oqartussat aningaasaleeqatigiittarput.

Siunnersuut isertitassanut sunniuteqartussaanngilaq, aammalu allaffissornermut sunniuteqassangatinneqarani.

 

Aalajangersakkanut ataasiakkaanut oqaaseqaatit

§ 1-imut

Siunnersuutigineqarpoq § 27, imm. 2-mi aamma § 29, imm. 2-mi killissarititaasoq "1. november nallertinnagu" sivitsorneqassasoq imaalillugu "1. december nallertinnagu".

§ 2-mut

Siunnersuutigineqarpoq Inatsisartut inatsisaata ullormit 1. juni 2000-imiit atortuulernissaa, taamaalillunilu siullerpaamik atuutissalluni ukiumut aningaasarsiorfiusumut 2001-imut nunamut tamarmut akileraarutissap aamma nunamut tamarmut akileraarutissap immikkut ittup procentissaannik aalajangiinissami.